NUUSBRIEF

19 September 2024
 
MISSIE JAPAN: NUUSBRIEF
 
Dit is skaars 2 weke gelede nadat ons afskeid geneem het van die Van der Watt gesin. Hulle was vir 3 maande in Suid-Afrika vir ‘n welverdiende tyd van verlof, die versterking van familie- en vriendskapsbande, sowel as besoeke aan verskeie gemeentes en ondersteuners regoor die land.  Net ‘n week voordat die Van der Watts teruggekeer het, het die groep van 6 lede van die RCJ se Diakonale komitee ook terug vertrek na Japan.  Hulle was hier in Suid-Afrika op ‘n 10dae lange Diakonale studiebesoek. Dit was inderdaad ‘n besige, maar heerlike tyd! 
 
Hierdie kort nuusbrief se doel is juis om ons ondersteuners op hoogte te bring van al die verwikkelinge hier by Missie Japan asook om terugvoer te gee oor besluite wat geneem is tydens ons Algemene Jaarvergadering wat einde Julie in Stilbaai plaasgevind het. 
 
Eers meer oor die besoeke.  Ons reëling is dat ons sendelinge elke 3 jaar vir ‘n tuisbesoek terugkeer na Suid Afrika.  Hierdie besoeke is tweeledig.  Die eerste oogmerk is om so veel as moontlik ondersteuners te besoek, gevestigde verhoudings te verdiep, terugvoer te gee en te getuig oor hulle bediening en lewe en werk in Japan.  Dit is natuurlik net so belangrik om ook in hierdie tyd nuwe ondersteuners te nader om die werk in Japan te ondersteun.  ‘n Tweede, maar uiters belangrike oogmerk is natuurlik dat hulle veral ook kan rus en weer hulle familiebande hier plaaslik kan verstewig.  Stéphan se ouers is nie meer jonk nie en daarom is elke besoek kosbaar vir hulle as familie.
 
Stilbaai het weer soos in die verlede gedien as basis vanwaar verskeie besoeke aan gemeentes regoor Suid Afrika gedoen is.  In hierdie tyd het Carina nog steeds met groot toewyding ook die tuisonderrig van hulle vier kinders voortgesit.  Ons het so baie versoeke gehad vir besoeke aan gemeentes, maar ons vertrou dat julle sal verstaan dat daar gewoon in 3 maande net nie tyd was om by almal in persoon aan te doen nie.  Maak gerus gebruik van Stéphan en Carina se aanbod om via Zoom tydens ‘n erediens in te skakel vir ‘n gesprek met die gemeente.  Ons gebruik die afgelope tyd hierdie tegnologie met groot vrug en die reikwydte daarvan is net soveel groter.
 
Stéphan het tydens die 3 maande in Suid-Afrika by verskeie gemeentes opgetree en groepsbyeenkomste gehou.  Soms was dit selfs ook moontlik vir die hele Van der Watt-gesin om van hierdie besoeke saam te doen indien die logistiek dit moontlik gemaak het.  Stéphan het ook in hierdie tyd verskeie kongresse en ander gespreksgeleenthede bygewoon.  Een so geleentheid was die konferensie oor diakonaat wat by die Universiteit van Pretoria aangebied is. Tydens hierdie geleentheid het Stéphan ‘n akademiese artikel voorgelê en ons vriende uit Japan kon ook daar iets deel van hulle ervaring in Japan wat betref diakonale werk.
 
Dan was daar die studie-besoek van die RCJ Diakonale komitee.  Die groep van 6 lede het bestaan uit ‘n leraar, ‘n dosent, ‘n sielkundige en 3 studente.  Die Diakonale komitee van die Reformed Church in Japan (RJC) is al vir baie jare ook finansieël in vennootskap betrokke by verskeie projekte in die NGK Vrystaat en Weskaap se sinode-streek. 

Verder het Missie Japan se bestuur einde Julie ‘n baie geslaagde algemene jaarvergadering gehou te Stilbaai. Met Stéphan, Carina en hulle kinders hier was dit ‘n tyd van vergader, saam besin, saam bid en saam onderskei vir die toekoms.  Dit was natuurlik ook tyd van ondersteun en saam dankbaar wees vir die Here se getroue goedheid en voorsiening oor baie jare.  Ds. Tobie en sy vrou Annalie de Wet is tans in Niihama in Japan en het dus via Zoom ingeskakel vir die vergadering

• Tobie en Annalie bly in Japan tot die einde van hulle 3 jaar tydperk (middel 2026) waarna hulle na Suid-Afrika sal terugkeer.  Missie Japan is verantwoordelik vir hulle repatriasie en herinskakeling hier in SA. 
• Die werksaamhede van MJ in samewerking met die Ring van Shikoku (waar die De Wet’s werksaam is) is vervat in ‘n nuwe samewerkingsooreenkoms wat in die finale stadium van finalisering is. Hierdie ooreenkoms bevestig ons verbintenis aan mekaar en die werk in Japan en dui ook die pad aan hoe ons te werk gaan met die beroeping van nuwe sendelinge na Japan. 
• Daar is ‘n versoek van die Ring van Shikoku om met die vertrek van die De Wet’s (wat tans as brug-sendelinge dien) ‘n nuwe sendeling paar na Japan te stuur.  Die Here het tydens ons vergadering hierdie versoek herbevestig en daar is besluit om voort te gaan met die werwing van ‘n tweede sendeling paar vir Japan in samewerking met die Ring van Shikoku. Die MJ kommissie wat die werwing van nuwe sendelinge sal doen, sal gelei word deur Ds Gawie Gouws van Swellendam.  Meer inligting sal later volg. 
• Daar sal DV in 2025 weer ‘n besoek aan Japan gebring word waartydens formele gesprekke gevoer sal word oor die nuwe samewerkingsooreenkoms wat ook die beroeping van ‘n nuwe sendelingpaar sal insluit. 

• Volgehoue ondersteuning deur gebede en finansies.
• Getroue meelewing met ons sendelinge in Japan (e-posse, WhatsApp boodskappe, oproepe, ens.)
• Hulp met die besoeke, gasvrye ontvangs, skep van geleenthede vir kontak, gesprekke, vervoer en verblyf, en etes ens. 

• Volgehoue voorbidding vir die Van der Watts en die De Wet’s se bediening, werk en lewe.
• Spesifieke voorbidding vir Niihama gemeente.
• Die proses om ‘n tweede sendeling paar te beroep vir werk in Japan saam met die Ring van Shikoku.